Monte Cintu

Da quand’è vo sbuccate, à mezi scogli, nant’à a spianatella di a cima, vi si ficca in l’osse, ancu d’aostu, un ziferettu chì limpa à curtellinu.

Sarete ancu stancu chì siccome, ùn averete mossu à a sbunurata stamane… È po, a teppa taglia l’anche…

Ma quand’è vo ghjunghjite quassù , chì tante fatiche ! A punta vi trae à l’insù cum’è ferru di calamita, è e vostre ghjambacce fruste vi portanu tandu cum’è ale.

In puntu à u Cintu, viderete chì ci hè un’aghjetta di catramu neru duv’ellu ci si pò calà ancu l’aliccotteru — or qual’hè chì l’averebbi creduta ! Ci anu dinù fattu, à penuccia più sopra, una spezia di sulaghjata di legnu di pinu, incastrata ind’a petra : soca ci vulianu stallà qualchì agrottu. Pocu impreme : voi, stracquatevi nantu, à corpu insù, è ripusatevi una cria à u sole chì bisognu n’averete. Basta chè vo ùn vi sporghite tantu in zimbricu chì porrestete ancu avvacinà da u spaventu : oh… oh… ùn hà omu micca tutti i ghjorni trè chilometri di lina sottu à i pedi. È po, à isse altrure, pò ancu toglie l’aria.

Quandi u vostru core a piglia più cù a calma, tandu, arrizzatevi puru, è fighjate.

Da Monte Cintu, si scopre venti !

Subitu, ùn saperete mancu induve fighjà : girate u capu, vi vultate… Site avvintu da l’aria sprifundata di i precipizii. À l’ochji dinù li ci volenu e ringhere pè pudessi appughjà è piglià e misure di l’abissi !

Ma chì volu maestosu chè vo li rigalate quand’elli si slancianu da nantu à e petrichicce !

O le creste, o li spinzoni, o le muntagne nudi chì inzeccanu u celu. O la stellaria d’isse petre tamante accatastate à u sole ! O li nomi cunnisciuti di e carti è di a mimoria, scuperti unu dopu à l’atru ind’i splendori di i so lochi !
Ghjacumu Fusina (1979)
I. À nantu à u testu (20 points)

1. Cosa risente l’autore quand’ellu ghjunghje in cima ?

2. Quand’ellu ci parla di l’aliccotteru perchè dice : « Qual’hè chì l’averebbi creduta » ?
II. Cunniscenza di lingua (20 points)

1. Spiecate e parulle

- sbunurata

- zimbricu

- inzeccanu

2. Cume hè fatta a parulla « à penuccia » ? Cunniscite altri mezi pè insiste ?

3. « Chì limpa à curtellinu » : spiecate « à curtellinu ».

Date dui o trè esempii puru cù un altru suffissu.

4. a) Rilevate inde u scrittu duie parulle suffissate. Date i diversi significati ch’elli ponu avè. Date esempii.

b) Truvate un’esempiu di parulla fatta cù dui suffissi accuppiati. Date u sensu.

5. Traduce

- Il me semblait qu’il y avait quelqu’un.

- Il aurait fallu que tu te lèves.

- Si tu avais mangé avant de partir, tu serai arrivé au sommet.
III. Spressione persunale (20 points)

1. L’aliccotteru à u Cintu ? Cosa ne pensate, cosa pò purtà u prugressu ?

2. Ci hè u turisimu di piaghja (mare), saria bè di sviluppà u turisimu in muntagna (interiore). Ci pò esse un altra forma di turisimu pè fà cunnosce a Corsica ?

ASPETTU E RISPOSTE

per sta sera bastara a virsione

Citation :

5. Traduce

- Il me semblait qu’il y avait quelqu’un.

- Il aurait fallu que tu te lèves.

- Si tu avais mangé avant de partir, tu serai arrivé au sommet.

Mi paria ch'ellu ci era a qualchisia
ci sarebbe vulsutu chi tu t'arrizzessi
si tu avia manghjatu prima di parte, saria (saristi) ghjuntu a u pinzu

Pocu dificiule
Induve l'ai pigliatu st'esame?

Quant'à mè què, ghjè un esame di u Bac litterariu. Peccatu ch'ellu sia cusì difficiule st'esame, ci vole à ammestrà assai assai a lingua...

L'esame ch'aghju passatu ghjèra più facciule (à postu chì ghjèra in a sezzione S). Ecculu :

WWW.MAZZERI.COM, GhjuvanLuigi Moracchini


I mazzeri, issi omi è donni chjamati pastori di i morti ! In sognu, partianu à caccia è si mittianu accantu à un fiumi à guattà l’animi chì giranu fora di a parsona addurmintata. E u mazzeru tirava à un animali è vidia trasfurmà si u so visu in quillu di una parsona cunnisciuta, parsona cundannata à mora pochi ghjorni dopu !
Ùn eru mai statu passiunatu par sti foli di a vechja cultura. I Paradisianti, i Ghjastimati, i Ghjuvannali… tutti sti muvimenti chì prupunianu una riflessioni annantu à l’omu, u so scopu, u so avvena ùn m’interessavanu micca di più. Tandu, à trentunanni, mi paria d’avè altri affari à fà. Dui figlioli, una famiglia à fà campà, un travagliu chì mi sfruttava è una passioni par i vitturi di cullezzioni chù mi pigliava tempu è soldi. A dì la franca, eranu passati i ghjorni senza ch’e’ mi primuressi di issu messaghju. E s’eranu alluntanati i moi ricordi di l’illuminatu quandu, cerchendu annantu à a reta un situ di cummerciu elettronicu, m’era vinuta in idea di stampètta l’adrizzu di u situ, www.mazzeru.com.

A prima pagina, ùn avia nulla di straurdinariu. Una introduzioni in inglese, (Welcome to the official Mazzeri’s Website !), una finestretta par abbunà si à una newsletter è una invitazioni à sceglia, trà cinqui banderi, a lingua di l’utilizadori. E dopu, par ugni lingua, u listessu cuntenutu : i mistieri tradiziunali, i foli i più cunnisciuti, u folcloru mazzeristu, un forum, un libru d’oru è unipochi di lei versu i siti i più cunnisciuti. Nulla dunqua chì mi permittia d’essa Mazzeru ! Aviu lettu calchì pagina. Eru cunvintu d’essa mi fattu burlà , quandu una finestra s’era aparta piattendu u fogliu cunsacratu à u sciamanismu : « S’è tù voli ESSA MAZZERU, pichja quì ! »

E aviu pichjatu ! Una antra pagina s’era aparta chì dicia « lascia un adrizzu elettronicu è u maestru di a reta ti scrivarà » è basta. Nulla d’altru, allora aghju scrittu u moi adrizzu, gm@scrit.cor.

U ghjornu dopu, riceviu un messagiu di u maestru di a reta.




CAPISCITURA (20 punti)


1) Quale sò i mazzeri ? (1 punti)

2) Chì facenu è quandu ? (1 punti)

3) Chì si sà di quellu chì parla ? (2 punti)

4) Circhendu un situ, chì indirizzu stampitteghja ? (2 punti)

5) Chì si po leghje nantu à a prima pagina ? (2 punti)

6) Spiecate « I mazzeri, issi omi è donni chjamati pastori di i morti » (2,5 punti)

7) Chì seranu « sti foli di a vechja cultura » ? spiecate (2,5 punti)

Perchè u persunagiu di u passu parlà di « burla » l.18 (3 punti)

9) Traducite da « Ùn eru mai statu passiunatu par sti foli…..www.mazzeru.com. » (5 punti)


SPRESSIONE PERSUNALE (20 punti)


Mazzeri, streghe, ochju…e cridenze, chì piazza anu avutu in a sucetà tradiziunale corsa ?
Fate u paragone cù a sucetà oghjinca. (20 filari è più) (20 punti)