Tocca aprile in paese d’Auccià è à Ghjuvà,face un bellu pezzu chì li trica d’andà à piscà per ‘sse muntagne di a Punta d’Isa è u Tirulellu.A dumenica da mane,sò cinque ore quand’ellu s’arrizza,pruvendu à un sveglià a so moglia addurmintata accantu à ellu è pigliendu u tempu di rimiralla una cria ch’ella pare tuttu un anghjulu….A passi pullitrini,fala in cucina à pigliassi un caffè cù dui canistrelli ;u tempu di scitassi da veru,chì ci serà vulsutu a passione per smatinà cusi à bon’ora,mentre ch’ellu travaglia a settimana sana per stantà u so pane ! Ma e pescie di u Pinzolu li frasturnavanu u ciarbellu dipoi ch’ellu era vultatu scozzulu scozzulu,di marzu scorsu,fendusi ghjucà à a risa da tutti i vechjetti di u paese.Allora oghje ùn ci serà nisun’ pietà per e truite ! seranu tutte ind’a so musetta da quì à sta sera è puderà francà capu altu è fieru u carrughju cù a so prisacca piena à tappu.A piscaghjola l’aspetta nantu à u terrazzolu è eccu ch’ellu a si piglia per a funtana di u Pughjolu ,à l’entre di u castagnetu per capità sinu à u munticellu chì strapiumba u fiumicellu.Quì,pianta una stundarella,vulendu godesi di a bellezza di sti lochi muntagnoli,quand’è l’ultimi ragi di a luna li danu ‘ssu culore attempu maravigliosu è misteriosu…
Ma eccu chì li pare di vede un omu appena più inghjò,piattu tra albitri è scope à orlu di fiume…A l’ascosu,fendu casu d’ùn scruchjà per ùn fassi rimarcà,s’avvicina un suppulu per circà à sapè ciò ch’ellu face quellu scrianzatu vicinu à u ghjargalu induv’ellu cuntava di piscà dipoi un pezzu ! U paisanu era impustatu,incu u so fucile è paria d’esse prontu à sparà ! Ma chì ferà pò questu quì à caccighjà d’aprile ? chì a caccia un hè ancu aperta ! Un averà tantu asgiu à pinsacci chì u trostu tremendu di e tartane u face trasaltà ! ò chì paura ch’ellu hà avutu chì era per penciulà.L’ochji avà sò aperti è bè,è l’omu a si piglia franchendu u fiumicellu per andà sin’à a bestia,stracquata ind’a fanga,mortu vulendu cacciassi a sete cum’è di solitu.U cacciadore s’avvicina,è s’inghjinochja per assicurassi chì u colpu era fatale,è mentre ch’ellu face vultà u capu di u cignale,u so rugnu piglia l’apparenza di un visu umanu !!
Ghjuvà ferma intrunatu, u so core mette à pichjà da falli schjattà u pettu è si ne diventa biancu cum’è un cadaveru…chì li pare di ricunnosce u so cuginu di terzu ch’ellu tene quant’è un fratellu ! Scappa à tronchera di collu sin’à u paese è si lampa subitu ind’u so lettu.A l’agrottu vicinu à a so amica,cerca di riscaldassi chì trimuleghja quant’è u trinichellu è ch’ella li vene ancu a frebba.Appicicatu cum’è un zitellu,è rassirinatu da quellu prufume d’amore,chjode l’ochji è s’addurmenta una stundarella.
Svegliatu da a moglia pocu tempu dopu,si dumanda s’ellu ùn hà micca fattu un gattivu sonniu ;fala in cucina è s’avvede ch’ellu hà lasciatu sopra locu a piscaghjola è tutta a so robba accunciata da passà una ghujurnata sana in muntagna ;ma li vene male à ricullà per ‘ssi lochi ! A so primura oghje hè di sapè sè u so cuginu hè in salute ! chì ciò chì hè successu li da assai pinseri !A cunnuscia ellu a storia di i mazzeri,a legenda piuttostu chì ùn ne cridia mancu stampa.Ma oghje,ciò ch’ellu hà vistu,o ciò ch’ellu pensa d’avè vistu,mancu ellu ùn a sapera dì,li hà arricatu un affannu maiò !! L’angustia nata da ‘ssa notte un hè per stancià,è un pudera stà senza sapè sè u so cuginu hè sempre vivu.Subitu prova à chjamalu ma ùn ci hè l’arte di pudèli parlà ;cresce l’angoscia da dalli a capaghjina.Impenseritu persu,atteppa sinu à a Costa in casa di u so ziu da dumandàli nutizie ;Petru era partutu incu i so amichi da scialassila una settimana in Patagunia ! cusi sera bellu luntanu di u paese è di a sorte ch’ellu li vulìa lampà quellu mazzeru crudelu ! cusi a si pinsava Ghjuvà,cuntentu cum’un pichju è prontu avà à vultà à u Pinzolu da racoglie i so affari…Di piscà ùn hà più laziu oghje ma ùn aspettera tantu à rivene chì a sa ancu troppu ,anu da falà e macagne sta sera !!
Ma quand’ellu chjama u destinu,ùn ci hè forza chì u pare è dui ghjorni dopu,una nutizia spaventosa vene à acciaccà u paese ! Petru è i so amichi eranu samariti ind’una falanga in muntagna ! ùn ci era statu mancu versu à ritruvàli i curciarelli ;chì spaventu ! Ghjuvà,chì era ingrandatu cù u so cuginu,era scunsulatu,addisperatu,ùn vulia mancu più parlà !Li venianu à mente quelle stonde zitelline,quand’elli cullavanu à piscà vicinu à l’anticu paese di a Mariaghja,chì era petru chì li avia trasmessi ‘ssa passione ;si ramintava dinù quelle feste in paese toccu sittembre,quand’è incu l’amichi a si passavanu ore sane à beie è à cantà… U ghjornu di l’intarru,sè pudemu parlà cusi,u paese sanu era unitu daretu à a famiglia tocca da a strage ;eranu vinute e famiglie d’ogni paisolu è a chjesa ùn pudia lascià entre à tutti da sparte a pena di i genitori addulurati.Ghjuvà ùn a facia à ritene e so lacrime è pienghjia à un più pudè,sopra tuttu quand’elli s’alzavanu i canti in San Antuninu,da davvi a carne ghjallinina ancu per un cunnosce a vittima…Ma ciò chì li scumudava u più era di vede qui,à mezu à ‘ssa ghjente afflita,l’omu chì avia tombu u cignale ‘ssu ghjornu funestu ;era un paisanu di u Crucoli,un paisolu appena scantatu ;avia i so sessanti anni è un passava micca per un omu gattivu…Pocu li impreme à Ghjuvà ;sè u so cuginu ,u so fratellu era mortu,era colpa di ‘ssu mostru è vulia ch’ellu sia casticatu ! A rivincinta si fera è nunda,è nimu ùn pudera impediscelu di vindicà à Petru !! Avia asgiu à ramintassi ciò ch’ellu avia amparatu nant’à i mazzeri,ch’elli ùn eranu micca culpevuli,ch’elli ùn eranu mancu cuscenti di fà u male ;ci vulìa à tutti i patti chì u tumbatore fussi culpitu ! l’odiu era crisciutu ind’u so core di modu tremendu,ùn pudia più rifrenà e so pulzione murtulaghje…Ellu chì ùn avia mai vulsutu male à nisunu era prontu à fà corre u sague…
Sò parechji ghjorni chì Ghjuvà aspetta u so nemicu,impustatu da sopra à u Pinzolu,piattu cum’è una volpa ;ogni notte ci volta incu u fucile ch’ellu hà imprestatu à babbò,ogni luna aspetta di vede affacà quellu chì,per ellu,era rispunsevule di a morte di Petru ! Ad un trattu,ecculu chì ghjunghje à mettesi à l’agrottu sottu à un castagnu maiò,vicinu à a vadina…Aspettera per pudè tumbà una volta di più ? Ghjuvà ùn lu lasciera fà ! n’avera fattu ancu troppu ! Senza avè mai amparatu à maneghjà i fucili,ecculu chì spara è li ficca una palla in core…Ind’un mughju spavintosu l’omu casca di u so appulatoghju è trabulica sin’à u guadellu ;u so sangue neru chì pare inchjostru scorre da a ferita sinu à annirisce i pozzi l’unu apressu à l’altru…Ind’u bughju di a notte pagna,a morte vene à ingutuppà u locu di u so velu oscuru.Un si sente un zittu,ancu u spiscinime di l’acqua ùn accarezza più e so arechje ;u tempu pare firmatu !!! Averà vintu Ghjuvà ? Vole essene sicuru è s’avvicina di a so vittima,guasi sinu à tuccàlu ;l’omu hè longu distesu,a chjocca in l’acqua nera chì ùn si vidia mancu u so voltu…Puderebbe parte avà Ghjuvà,a morte di Petru era vindicata,ma andate à sapè ciò chì u punta à fermà quì,impalaficatu,à a mutesca .Un vole vultassine senza vede un ultima volta a faccia di u mazzeru...Ind’un silenziu angusciosu,trimulendu è ghjaciatu da l’ambiente funestu,face girà lu so capu,pianu pianu…sinu à acorghjesi chì u visu di a vittima…hè u soiu… !!!!
Accueil 
Rechercher 
S'enregistrer 
Connexion 
Sujet: U piscadore è u mazzeru... 
bravu!
mi ne dubitava chi tu m'avia palisatu