SAFARI in ALTA-ROCCA...

Mauvais rève ou réalité?


SAFARI in ALTA ROCCA



Addiu a te furesta cara
Boscu di li Palavisani
Addiu, l’omu ti pripara
U to sfatteghju di a so mani
Dici che per da l’acqua in piaghja
Chi ta pineta, devi raghja


A u fà di u ghjornu in Quenza,u sole vene à scaldà i spini di i primi paisani,affacindati ind'e so piccule lenze incu e so pumate,i so fasgioli e altre zucchine…So scarsi i zappaghjoli à pudè sempre stantà u so pane in paese ,chì a terra hè diventata una richezza,e soli i più furtunati ponu sempre apprufittà di stu piaceri…

Sò belli cambiati l’affari ind’u rughjone dipoi u principiu di u sicondu millenariu,più di deci anni fà:orti e fruttaghji sò stati rimpiazzati da caseddi e altri casone da affittà,appighjunà per i frusteri sempre più numarosi à vulè vene è scopre u paese !

In Quenza ci sò oghje 6 « hotels » novi framante,custruiti in un milampu ;"Ibis,Mercure,Sofitel" e chi ne so eiu ! So tutti scalati qui ;è ind’è ogni paese o guasi ! Zonza,Santa-Lucia,Surbuddà è Zerubia induve Dumenicu Ribeddu ùn ricunnosciaria mancu più i so lochi…Ci anu fattu ancu un « complexe » in Bavedda,in giru à a Madonna,casticata da tamanta disgrazia !

So ghjunti i turisti e i prumutori di tutte le mamme ! ci vole à dì chi l’idea era assai ingeniosa ! L’avianu avuta certi omi di u locu,d’aprile 2007 dopu à a corsa di vittura « Rallye de Tunisie »…Un idea tremenda ch’avia cambiatu a sorte di a ghjente di l’Alta-Rocca !!
Da Sulinzara sin’à Prupìa,da Zìcavu sin’à Murateddu a vita era bella cambiata !!U silenziu di a muntagna,u soffiu di lu ventu, u sfrangagliulime di e sunagliere di e mule o a misciulella di a funtana d'estate eranu rimpiazzati da u frombu di li mutori !! Da a muntagna di Cagna sin’à Alcudina ùn si sintia più che u trostu spripusitatu di i vitturoni,di i « quads » o altre « Jeep » !

L’Alta Rocca era diventata u paradisu Auropeanu di a cacciamossa :ci eranu e piste,e muntagne diserte,a natura immaculata,i parcorsi strasurdinarii eppò ci eranu sopra tuttu l’animali !! Cumu avianu fattu per ùn aveci pinsatu l’antenati ? U sviluppu di u « Safari » avia da cambià u destinu di sti lochi spupulati…Un s’eranu micca sbagliati questi precursori d’un avvene surridente à a ghjente di sti lochi,ch’avianu troppu suffertu di a puvertà e di l’isulamentu …U mondu sanu vene à spende i so soldi in stu novu « eldorado » !! Abbastava à mette in ballu u prughjettu incù l’aiutu di e culletività,ciò chì era fattu à l’affuria,senza difficultà chi ci vulìa à fà qualcosa,di sicuru…

Quenza era diventatu u capilocu di a battuta à u cervu ;u cervu Corsu ch’avia smaritu in u sessanta nanzu di vultà per esse stirpatu una volta di più !Ci eranu parechje greghje pe ‘sse fureste e un ci era pinseru di vedeli scumparì,chi casu maì ci ne pudianu mandàci qualchi ad unu i nostri amichi di Sardegna…Ma avianu dinù vulsutu priservà qualchi locu d’incantu i prumutori ! Per indettu,era pruibitu di caccighjà nantu à u Cuscione,chi stu locu era diventatu un « Golf » Internaziunale incu un ottellu magnificu in Bucchinera,tuttu fattu à vetri e à strutture di mettalu ! Una maraviglia…
Di Bavedda partianu e scorte di vitture per Illarata,Larone o Asinao à buscà e muvre,piatte ind’e i lochi i più scantati per ùn esse culpita da u piombu,quassù eranu à l’ascosu…Ma à spessu un muvrinu chi s’era alluntanatu appena era ammazzatu da un turistu carcu à soldi chi pudià arricà lu e mette u so capu insanguinatu ind’u so scagnu Pariginu…
In Santa-Lucia o Livia,di « Diorite” o d’oliu finu un si ne primuravanu guasi più l’abitanti ;ci vulìa à dà capu à u cunfortu di i cacciadori chi capitavanu quì à buzzeffu ! chì ci era divizia di cignale,parnice,culombi o levre in giru à Cucuruzzu,chi era diventatu un locu cunnisciutu da tutti per a so cucina tradiziunale incu u salvaticume e l’ucellame di ‘sse machje tra Fiumicicoli e Rizzanese !


Un pudianu esse che beati,allegri l’abitanti di sti lochi ;ci eranu i soldi,ci eranu i turisti,si parlava di u so paese ind’u mondu sanu ! UNA CAMPA !!!