U LIBRU DI U PASTORI

U libru di u Pastori

Mi trovu à l’abbrugata
Di à vita d’un pastori
Una vita strappazzata
Dà millaghja di malori
Chi he stata cunsacrata
A quissu santu lavori

U chjassu tiraia drittu
Deserta era à via
Ghjuntu à u puntu scrittu
Sona sgià l’ave maria
E u tempu si stà zittu
Chi nisunu ci cridia

In u so caru caseddu
A preguera li tocc’à fà
Quidda di un pastureddu
Ch’à l’eternu devi andà
Lachendu u so capeddu
Pà chi u voli ricurdà

Marchja disgia à so menti
In quiss’ultimu caminu
Rinvivendu i mumenti
Di quand’era ziteddinu
Quissi ultimi ramenti
Ch’avarà sempri vicinu

A principiatu à viaghjà
In l’ultima muntagnera
Lampedu pà issi quallà
A so ultima preghera
Quidda di sempri ricurdà
L’omu sinceru ch’idd’era

Pà quiddu ch’hà tuttu spartu
In ’ssa vita di sudori
Lampu avà à scuppartu
Una chjam’à u signori
Di mantena sempr’appartu
U libru d’issu pastori

U PASTORI BUNIFAZINCU