Perla d'Uriente

Chi bella ghjurnata eri...Bedda ghjurnata possu ancu di chi mi socu arrizzatu ind'u beddu paesi d'Auccià,sottu à Bicugnà...

Partutu à bon'ora...iè 9 ore e mezu ghjè " à bon'ora" quand'omu hè in "dumenicata" di Natale...
Ghjuntu in Vizzavo,à a foce,eccu chi ci so ghjà i mo 3 amichi,partuti elli di u Viscuvatu...poca strada ch'elli anu fattu per cullà sin'à qui...

Ma eti da capiscia ch'eddi ani fattu bè ! chi a ghjurnata fu maravigliosa...
Pigliemu subitu subitu a strada di muntagna,sottu à i faii magnifichi di a furesta di Vizzavona...U tempu hè frischettu,chi u sole,arrizzatu à Cismonte,si face sempre aspittà appena nantu à e creste...

Ghjuntu à i stazzi di i Pozzi,aspittendu sempre i ragi da scaldàssi appena,ci pigliemu un "thé" per circà appena di curagiu ! cusi beddi stazzi,incu i so caseddi fatti à petre seche,i so compuli,chjostri e chjustroni...E sopra tuttu,quella magnifica funtanedda chi m'era firmata à mente dipoi piu di 20 o 25 anni !!!!!!!

U sole accarrezza e creste à l'insu e ghjè ora di ritruvàlu per viaghjà inseme sinu à a punta Gradu,vicina à a Madunuccia stantarata ind'a so biddezza...

Ghjunti quassu,si vede sinu à u San Petrone e e Caldane,i paesi di u Vinachese e di sicuru à Tattone,sottu à u gran Monte Cardu...
A foce hè sottu sottu,incu u forte custruitu tempi fà,e a valle di l'Agnone chi a si muntagna tra Oru e CAncellone...Ghjè qui ch'omu po vede e "cascades" des Anglais,cunnisciuti al di là di u mare !!

A manu manca,falla furiosa a Gravona,incu i paesi di Bucugnà,Carbuccia;Auccià e Tavera so à l'appiatu,soiccati da a Punta d'Isa !!

Eppo à l'insu,eccu l'Uriente;muntagna scunnisciuta chi u GR 20 l'ha tralasciatu...Ma ellu un hè mancu impenseritu chi a sa,ellu,chi e so billezze so riche quant'è quelle di l'altri monti...Fieru e maistosu,inguttupatu di neve fresca,lascia nasce à u so fiancu u Fiuminaltu chi ci rigala di u rimore di l'acqua ...

Stracquatu in l'arba verde verde,incu a neve vicina,chjodu l'ochju e mi dumandu s'ellu hè cusi bellu u paradisu...

è piu bellu u paradisu a ti dicu chi un ci è nimu per cunturbàlu.. ti macagnu, bellu racontu.