U Carnavale di Bastia...

U Carnavale di Bastia

Hè d'un pezzu ch'ellu aspetta Lisandru nant'à u catramu di a piazza San Niculà,affiancatu da a so cugina Maria,tinendulu forte da ùn lasciallu corre à trunchera di collu cum'ellu face di solitu.T'hà solu cinque anni è serà a prima volta ch'ellu viderà u Carnavale,chì l'usu s'era persu in Bastia dipoi parechji anni.Maria,ella,si n'arricorda puru bè di quand'ella era zitella:U carnavale di Bastia,tandu,era una festa tamanta per i zitelli;festa di milli culori è milli canti.Cù e so amiche majorette marchjavanu fiere è facianu a fierezza di tutta a famiglia;pò vinianu i carri urnati di milli fiori cù i musicanti chì purtavanu l'allegria è facianu schjarisce i visi di i zitelli è di e mamme spinserate.Allora dipoi tant'anni ùn vulia lascià l'uccasione di vede vultà u Carnavale nantu à a piazza è apprufittava di purtà u so cuginu per pudè truvà una scusa è vene quì senza fassi ghjucà à a risa da e so amiche in brama di tippi ricchi cù belle vitture è tuttu ciò chì ci vole...
Oghje,c'è assai ghjente chì aspetta u ritornu di u Rè di u Carnavale.Mamme è zitelli ma dinù vechji Bastiacci ch'ùn avianu altre cose à fà in stu ghjornu di ferraghju:per una volta ùn ci serà bisognu di fà u colla è fala a ghjurnata sana,cù a baretta incalfata sinu à l'ochji è a pippa à l'usu anticu.A piazza era colma à tappu è ùn c'era l'arte di pudè mutà locu senza piglià u risicu di manca u carru maiò! Face chì a folla era accumpulata sott'à a statula di u megalo di Napoléon,vestutu à l'usu Ghjuliu Cesar è ùn si vidia guasi nunda fora di i niuli di fume di i battelli chì facianu u pass'è vene un'ultima volta,aspittendu a custruzzione di u portu maiò di a Carbonite.I caffitteri di a piazza cantavanu cù l'anghjuli,chì i capuccini è cicculate si vindianu miraculi,è e terrazze eranu accampate dipoi un bellu pezzu avà.Guasi guasi nascianu l'imbarrufate per pudè pusà chì a ghjente s'allampava cum'è acelluci nant'à i baghi,senza nisuna curtesia è senza mancu ripsettà l'anziani chì grugnulavanu u so addisperu nanzu di vultassine in casa...
Lisandru era impaziente è cuminciava à fà rincresce à a so cugina Maria d'esse vinuta cù ellu ind'è sta trappula;u fretu picciava sempre di più è u zitellu mughjava apressu à ogni ziteletta chì s'avvicinava,chì dipoi ch'ellu era natu,avia sempre avutu u viziu per falle scimisce è pienghje...Una vechja strega chì purtava a so figliulina cuminciava à inzergassi è liticava à Maria chì si n'infuttia è si tramutava prestu per ùn avè à esse scrianzata è rispondeli da veru...Ma eccu chì u trostu di u Carnavale si face di più in più vicinu,Lisandru,sticchitu cum'è un palu,sente u so core batte chì pare ch'ellu appia da schiattà;i zitelli à l'ingiru mettenu à ughjulà,fendu cresce l'animosità di Maria contru à u mondu sanu,cum'è a maiò parte di e zitelle di 16 anni...Maria face per parte,strascinendu u so cuginu cum'è un saccu di suvu quandu s'affaca u primu carru...
Hè a prima volta ch'ella vede un carru cusi:un carru turchinu è neru,senza fiori nè altri culori,cù spezie di Tortue Ninjas chì parenu di parte à a guerra;era un camiò di CRS cù tutti i so pulizzeri nentru chì apria u cortège...Què pò allora,sò belle cambiate l'affare in Bastia,diceremu chì l'affare sò in Francese...Cusi si seguitanu deci camiò di pulizzeri novi framante,cù i so Tortue Ninjas fendu a spacca nant'à a piazza,surridendu è scaccanendu di vede a ghjente cusì affanata fora di qualchì vechju cuntentu cum'è un pichju,nostalgicu di Petain ò di bonnet,andate puru à sape...Dopu à i camiò sò duie cumpagnie di CRS chì s'affacanu à pedi,cù elmi è scudi lucichenti,fendu un tazzu angusciosu da fà pienghje tutte e zitelette senza chì Lisandru ùn appia più bisognu di stuzzicale.U spittaculu era spavintosu,dopu à i pulizzeri s'affacavanu i giandarmi,di tutte le mamme cù tutti i so uniformi militari chì riprisentavanu tandu i soli culori di stu carnavale.

Per compie u rigalu,eccu infine u carru maiò accumpagnatu di tamburi è trumbette di a fanfara militare,cù u sgiò merre di Bastia à u postu di u Rè:Milou era quì,fighjendu da altu cù smorfia è albasgia u populu chì l'avia elettu una volta di più qualchì mese nanzu;salutava cù dipsrezzu l'omi è donni stumacati ma sempre pronti à purtallu nant'à l'altare di a pulitica Bastiaccia:Lisandru u cunsiderava cù i so ochji zitellini è studiava u so modu di fà mottu à a ghjente cù manere preziose è orgugliose,un veru carnavale...

mi piace eiu e tortue Ninja!
quale ha scrittu u carnavale di Bastia?

per u restu, mi pare chi parechje cose so perse in Bastia, aghju u ricordu d un altru Bastia
cu una piazza San Nicula e un mercatu e altre piazze vivi vivi che mai un videraghju piu cusi

Mosquito a écrit:

quale ha scrittu u carnavale di Bastia?

Pampasgiolu a écrit:

Mosquito a écrit:

quale ha scrittu u carnavale di Bastia?

perchi

era ghjustu una quistione, ghjuca micca nant' e parole...dopu Sarko in d altre sezzione, u re milou qui, fora di pulica, ti dumandava quale avia scrittu stu testu....si tu?

Un hè micca pulitica,ghjè l'epica di u carnavale,n'hè?

allora anderemu inseme a vede i carri di e "cupulatte-ninja" .....