quandu aghju fattu a prisintazione di a ghjurnata chi vene, aghju parlatu di a "chouette" chi omu si po vede nantu a chjoma di sta squadra. Subitu, MNT m'a rispostu incu una macagna, ghjucandu incu i nomi di st'acelli.
Tandu, aghju fattu marchjà Google per pudè sciaccane un altra e aghju trovu pareghje cose chi fanu riflette per cio chi è di a lingua corsa.
U nome latinu di a famiglia di a "chouette" si dice "Strigidae". E cusi si raghjunghjanu ligenda e vucabulariu, chi l'avete capitu, in corsu, truvemu a "streghje" la sorcière.
E cusi ch'ellu si vede chi stu tintu acellu chi un face male a nimu, for di i topi, e dapoi seculi e seculi, imbulighjatu incu a mitulugia e particularmente incu i cattivi persunaghji chi populanu e notte, mazzeri, squadra d'arozzu e altri battuduli.
MNT parlava di l'effraie, acellu biancu ch'omu si trova (ben chi scarsa in corsica). U nome nustrale è a malacella bianca. E m'ariccordu, ghjovannu chi era, passandu per a Balagna, avè vistu malacelle inchjulate nant'e porte di pagliaghji. A malacella, a streghje, chi cunfusione!