A cumuna sarda d'Aggius chjama l'autori sprimendusi in corsu o in gallurese pè a seconda edizione di u cuncorsu litterariu ch'ella urganizeghja - u Premiu Agghju di conti Gaddhuresi e Cossi - gestitu in Corsica da l'associu Matina Latina. Ci vole chì i raconti pruposti, nant'à un tema liberu, ùn sianu digià stati premiati nè mancu presentati à un altru cuncorsu eppo diventeranu, secondu u regulamentu, a pruprietà di a cumuna d'Aggius.
Ogni participante pò presentà solu un scrittu, chì ùn francherà cinque pagine stampittate. In ogni categuria - corsu è gallurese - trè premii seranu dati da duie ghjurie distinte u 13 di maghju di u 2006 in Aggius. Lisandru Marcellesi, Rinatu Coti et Marceddu Jureczek anu da esse i membri di a ghjuria pè l'opere in lingua corsa. In a nostra isula, l'autori bramosi di cuncorre devenu mandà un esempiariu di a so opera - micca firmata - à l'associu Matina Latina, Immeuble Le Golo - Bât D, rue Aspirant Michelin, 20090 Aiacciu nanz'à u 25 d'aprile. In stu currieru, li tuccherà à aghjunghje un'inviluppu sugellatu cù nome è casata, indirizzu, numeru di telefunu…